Müsavatçı gənc həbsdə qaldı
Fevralın 1-də Bakı Apellyasiya Məhkəməsində müsavatçı gənc Elvin Paşayevin şikayətinə baxılıb. Yanvarın 23-də narkotik maddələrin satışı ittihamı ilə həbs edilən müsavatçı gənc barəsində seçilmiş 4 aylıq həbs qətimkan tədbiri dəyişdirilməyib.
E.Paşayevin vəkili Nemət Kərimli Müsavat.com-a deyib: “Nərimanov Rayon Məhkəməsinin Elvin Paşayev barəsində çıxardığı həbs qətimkan qərarından verdiyimiz şikayətə baxıldı. Elvin özü də məhkəmədə iştirak edirdi. O, prosesdə bildirdi ki, “Feysbuk”da yazdıqlarına və Sumqayıt Dövlət Universiteti barəsindəki məqaləsinə görə həbs edilib. Həbsinin siyasi xarakterli olduğunu bildirdi. Sosial şəbəkədə bahalaşma əleyhinə “event” yaradılıb və Elvin həmin “event”də fəal iştirak edib. Yanvarın 23-də dərsə gedərkən saxlanılıb, özlərini təqdim etməyən 3-4 nəfər mülki geyimli şəxs tərəfindən zorla maşına mindirilib aparılıb. Onun sol cibinə 65 qram narkotik maddə qoyulub. Barəsində həbs qətimkan tədbirinin seçilməsi ilə bağlı məhkəmə qərarında ortaya heç bir sübut qoyulmadı. Qanunsuz olaraq məhkəmə şikayətimizi təmin etmədi”.
Vəkil gənc fəalın psixoloji durumunun gərgin olduğunu da qeyd edib: “Elvin bir az gərgin vəziyyətdədir. Bu cür ədalətsizlik ona ağır təsir edir. Yaşadığı cəmiyyətdə olan ədalətsizliklə barışa bilmir. Elvin saxlanılarkən təzyiqlərlə üzləşib. Onun əllərini qaldırıblar və açıq şəkildə cibinə narkotik yerləşdiriblər. İclas qapalı olduğundan yaxınları apellyasiya şikayətinə baxılması prosesində iştirak edə bilmədilər. Hazırda Elvin 1 saylı Bakı İstintaq Təcridxanasında saxlanılır”.
Elvin Paşayev Müsavat Partiyası Qubadlı rayon təşkilatının və partiyanın Gənclər Təşkilatının üzvüdür. Sumqayıt sakinidir. Sumqayıt Dövlət Universitetinin məzunudur, ixtisasca filoloqdur. “Hədəf” hazırlıq kursunun müəllimidir.
