Yanvarın 12-də İstanbulun Sultanahmed meydanında törədilən terror aktında ölən on nəfərdən səkkizi Almaniya vətəndaşıdır. Bununla bağlı məlumatı ölkənin hakimiyyət orqanları təsdiqləyib.

AZƏRTAC Rusiyanın TASS informasiya agentliyinə istinadla xəbər verir ki, Almaniya Federativ Respublikasının daxili işlər naziri Tomas de Mezyer bu gün İstanbula gedəcək. O, hücumun baş verdiyi yerə baş çəkəcək və Türkiyə hökumətinin nümayəndələri ilə görüşəcək.

İstanbulun əsas turistik məkanlarından biri olan Sultanahmed meydanında baş verən partlayış nəticəsində 10 nəfər ölüb, 15 nəfər yaralanıb. Suriyadan olan terrorçu özünü almaniyalı turist qrupunun yaxınlığında partladıb.