Prezident İlham Əliyevin 25 noyabr sərəncamı ilə rabitə və yüksək texnologiyalar nazirinin birinci müavini təyin olunan Ramin Quluzadə nazir səlahiyyətlərini icra edəcək. Xəbəri nazirlik rəsmən yayıb.

Məlumata görə, dövlət başçısının digər sərəncamına əsasən, İltimas Məmmədov rabitə və yüksək texnologiyalar nazirinin birinci müavini vəzifəsindən azad olunaraq nazir müavini təyin edilib.

Nazir əvəzi Ramin Quluzadə noyabrın 25-də Rabitə və Yüksək Texnologiyalar Nazirliyinin kollektivinə təqdim olunub.

Transparency.az/cnews bildirir ki, Ramin Quluzadə 1977-ci il fevralın 1-də Bakı şəhərində anadan olub. Yasamal rayonundakı 167 saylı orta məktəbin məzunudur.

Azərbaycan Dövlət İqtisad İnstitutunu 1997-ci ildə bakalavr, 1999-cu ildə magistr dərəcəsi ilə bitirib.

2005-2015-ci illərdə Heydər Əliyev Fondunda fəaliyyət göstərib.

Azərbaycan Respublikası prezidentinin 2014-cü ildə imzaladığı sərəncama əsasən, Heydər Əliyev irsinin qorunması və təbliğində səmərəli fəaliyyətinə görə “Tərəqqi” medalı ilə təltif edilib.

Ailəlidir, 2 övladı var.

Noyabrın 12-də Əli Abbasov rabitə və yüksək texnologiyalar naziri vəzifəsindən çıxarılıb. Əli Abbasov rabitə və yüksək texnologiyalar naziri (əvvəllər rabitə və informasiya texnologiyaları naziri) postunu 2004-cü ildən tuturdu.