İmperiyaya cavab zərbəsi
Oqtay Qorçu
İmperiya cavab zərbəsi endirsə…
Finlərin, türklərin, ingilislərin, bolqarların, polyakların, macarların, fransızların, xorvatların, Bosniya türklərinin, yəhudilərin, almanların, ukraynalıların, tatarların, türkmənlərin, kazakların, belarusların, qazaxların, taciklərin və özbəklərin, azərbaycanlıların, gürcülərin, çeçenlərin və digər dağlı xalqlarının əbədi və əzəli düşməni olan, “xalqlar həbsxanası” yaradan dünyanın ən böyük şər imperiyası Rusiya, sözsüz ki, Türkiyədən qisas almaq üçün hərəkətə keçəcək.
Hələ ki, bu planın nədən ibarət olduğu, harada və hansı şəraitdə baş verəcəyi məlum deyil. Hazırda bizə məlum olan ancaq bir fakt var – Rusiya özgənin sərhədini pozub və Türkiyədən belə sərt cavab alacağını ağlına da gətirməyib. Özünü məğlubedilməz dövlət, dünyada ən güclü, qüdrətli orduya sahib sayan Rusiya Federasiyasının hərbi kontingentinin, müxtəlif qoşun növlərinin zaman-zaman neçə-neçə ölkənin sərhədini saymazanlıqla tapdalayıb keçdiyi və cəzasız geri döndüyü çoxlarına məlumdur. Yaxın-uzaq qonşularına sataşmaq, onlara mənəvi, psixoloji və hərbi təzyiq göstərmək bu ölkənin artıq adətinə çevrilib. Rusiya ocaq çatmaqda mahirdir və həmən ölkədir ki, öz ərazisində ona qonaq gələn xarici ölkə prezidentini, dövlət rəsmilərini təyyarə qəzasına salıb hamısını məhv eləmişdi.
Tarixdə baş verənlər, illər uzunu davam edən Rusiya-Türkiyə savaşları bizə tək bir dərs verib. Türkiyəni ayaqlamaq olmaz. Bu qüdrətli ölkəni qan gölünə çevirmək, yarı bölmək də mümkündür, onunla illərlə savaş aparmaq da olar, ancaq Türk qürurunu, Türkiyə və Türk dünyası birliyini sarsıtmaq, parçalamaq mümkünsüzdür.
Rusiya Hərbi Hava Qüvvələrinə məxsus, Türkiyə sərhədini keçəndə vurulan hərbi təyyarə İŞİD-ə qarşı döyüşənlər sırasında olsa da, “SU-24” qırıcısı əslində Suriyada qardaş qırğınına rəvac verən diktator Bəşər Əsədi qorumaq üçün göndərilib. Və ilk baxışdan Rusiyanın İŞİD terrorundan qurtulmaq adıyla start verdiyi əməliyyatların, siyasi, hərbi missiyanın özü belə şər gedişinin bir hissəsidir. Rusiya təyyarələri Suriya səmasında uçur və dünyada ən radikal islam təşkilatı hesab edilən terrorçu İŞİD-ə görə müsəlman Şərqi, onun tarixi tar-mar edilir. Rus təyyarələri Suriya ərazisində türkmənlərin başına bomba yağdıra-yağdıra həm də dünya xəritəsinə yeni Kürdüstan dövlətini sırımaq istəyir.
Türk hərbiçiləri rus təyyarəsinə dəfələrlə xəbərdarlıq ediblər və sonrası da məlumdur. Qırıcı yana-yana çırpılır yerə, özünü paraşütlə tullayan pilotlardan biri ölür. Türkiyə bu insidentin baş verməsində günahkar deyil, haqlı tərəfdir. Və bu, Rusiyaya böyük dərs olacaq. İndi Rusiya özgə sərhədi yaxınlığında səksəkə ilə uçub, dolanacaq. İndən sonra…
Rusiya bir daha qarşısında Türkiyəni gördü…
