İranda Azərbaycan türklərinin etiraz aksiyaları (VİDEOLAR)
Noyabrın 6-da İran İslam Respublikasının “İRİB TV 2” kanalında yayılan, Azərbaycan türklərinin heysiyyətinə toxunan proqrama etiraz olaraq noyabrın 9-da bu ölkənin paytaxtı Tehranda, Güney Azərbaycanın bir sıra şəhərlərində etiraz aksiyaları keçirilib. Aksiyalarda şovinizm, irqçilik əleyhinə şüarlar səsləndirilib.
İranın Dövlət Teleradio Şirkəti bəyanatla çıxış edərək proqrama görə Azərbaycan türklərindən üzr istəyib və təhqirə yol vermiş “Fitil” (“Fitilieh”) verilişinin yayımının dayandırıldığını açıqlayıb.
Qeyd edək ki, “Fitil” uşaqlar üçün nəzərdə tutulmuş komediya proqramıdır. Noyabrın 6-da proqramda belə bir səhnəcik hazırlanıb: atasıyla oteldə qalan azərbaycanlı uşaq tualet fırçası ilə diş fırçasını səhv salır və dişlərini tualet fırçasıyla təmizləyir. Atası oteldən gələn pis qoxuya uşağın səbəb olduğunu bildirərək otel sahibindən üzr istəyir. Proqramda uşaqla atasının dialoqunun bir hissəsi Azərbaycan türkcəsində gedir.
İranın Dövlət Teleradio Şirkəti vəd edib ki, təhqirə yol vermiş “İRİB TV 2”nin məsul şəxsləri cəzalandırılacaq.
