“Facebook”dan xəbər saytlarına girənlərin sayı azalıb
“Facebook” sosial şəbəkəsindən media qurumlarının saytlarına girən istifadəçilərin sayı azalıb. Novator.az xəbər verir ki, araşdırmanı “SimpleReach” analitik şirkəti aparıb.
Araşdırmaya görə, 2015-ci ilin yanvar-oktyabr aylarında “Facebook”dan media qurumlarının saytlarına giriş 32% aşağı düşüb.
İri media qurumlarının saytlarına keçiddə azalma daha çox olub: 42,7%. Bu, 10 iri media qurumu üzrə hesablamanın orta göstəricisidir. Ayrı-ayrılıqda götürəndə daha böyük rəqəmlər alınır. Məsələn, “Facebook”dan “Huffington Post”a daxil olanların sayı 60,1%, “Fox News”a daxil olanların sayı isə 48% aşağı düşüb.
Yanvar-sentyabr aylarında “Facebook”dan 50 xəbər saytına girişi izləyən “SimilarWeb” informasiya texnologiyaları şirkəti də “SimpleReach” şirkətinin apardığı araşdırmanın nəticəsini təsdiqləyib.
“SimpleReach” analitik şirkətinin araşdırmasında deyilir ki, sosial şəbəkədən iri media qurumlarının xəbər saytlarına giriş ən çox fevral ayında azalıb: 75%. Mart-aprel aylarında da qismən azalma olub. May ayından isə sosial şəbəkə “Facebook Instant Articles” xəbər platformasını işə salıb və azalma tendensiyası bu fonda da davam edib. İri media qurumları əvvəlcə “Facebook”un yeni platformasını qəbul etməsələr də, sonradan onun ən böyük tərəfdaşına çevriliblər.
