Dünyadakı saytların 25 faizi “WordPress”də qurulub
Hazırda dünyada fəaliyyət göstərən bütün saytların 25 faizi “WordPress” sistemində qurulub. Novator.az xəbər verir ki, bu statistikanı “W3Techs” informasiya texnologiyaları saytı açıqlayıb.
“WordPress” platformasını 2003-cü ildə proqramçı Mett Müllenveq yaradıb. Sistemi yaradanda Mett Müllenveqi, demək olar, heç kim tanımırdı və “WordPress”in belə məşhur olacağı kimsənin ağlına gəlmirdi. İndi isə dünyanın hər dörd saytından biri “WordPress”də düzəldilir.
“WordPress” platforması sayt hazırlayanlara geniş modifikasiya imkanı verir. Burada yaradılan saytı, demək olar, istənilən dizayna salmaq mümkündür. Amma bu görünüşün kökündə vahid texnologiya durur.
“W3Techs”in açıqladığı statistikaya görə, 2011-ci ildə dünyadakı saytların 13 faizi, 2014-cü ildə 21 faizi “WordPress”in payına düşürdü. Bu, “WordPress” platformasının ildən ilə məşhurlaşdığını göstərir.
“WordPress” sistemi müstəqil “GNU” lisenziyası, WordPress.com domeni üzrə yayılır. Platformanın son “Billie 4.3” versiyası 2015-ci ilin avqustunda çıxıb.
