Rabitə və Yüksək Texnologiyalar Nazirliyi “Elektron hökumət” portalında “E-Gov mobil identifikasiya vasitəsi” elektron xidmətini istifadəyə verib.

“E-Gov mobil identifikasiya vasitəsi” – “E-gov identity” sistemə giriş üçün vətəndaşın mobil telefon nömrəsi üzrə FİN-i tanıma rolunu oynayır.

“Elektron hökumət” portalına girişi təmin etmək üçün vətəndaş sadələşdirilmiş autentifikasiya vasitələrinin hər hansı birindən istifadə edərək portala daxil olub yaradılmış xidmət vasitəsi ilə “e-identity”yə qoşula bilər.

Bu zaman vətəndaş heç bir fiziki müraciət etmədən elektron formada mobil identifikasiya vasitəsinə qoşula biləcək və daha sonra istər “Elektron hökumət” portalına, istərsə də xidmətin inteqrasiya edildiyi digər portallara giriş əldə edə biləcək.

Portala daxil olan vətəndaş hazırlanmış interfeysdən istifadə edərək adına olan mobil telefon nömrəsini FİN-ə qoşmaqla prosesi tamamlamış olacaq. Bunun üçün SMS vasitəsilə aktivasiya edərək təyin edilmiş identifikasiya kodunu əldə edəcək. Bundan sonra vətəndaş “E-gov identity”  identifikasiya istifadə edilən bütün sistemlərdən rahat istifadə edə bilər.