“Wi-Fi”ın köməyilə divarın arxasındakı adamı görmək olacaq
ABŞ-ın Massaçusets Texnologiya İnstitutunun tədqiqatçıları “Wi-Fi”ın köməyilə divarın arxasındakı adamın siluetini görməyə imkan verən sistem hazırlayıblar.
Novator.az xəbər verir ki, “RF-Capture” adlanan qurğu amerikalı alimlərin hazırladğı xüsusi proqramın sayəsində divarın arxasındakı adamın bədəninin ayrı-ayrı hissələrini müxtəlif rənglərlə təsvir edir.
Qurğu insanın fiqurunu və hərəkətlərini 90% dəqiqliklə tanıya bilir. Bundan başqa, mexanizm divarın o tayındakı qonşu otaqda olan 15 nəfəri eyni vaxtda müəyyən və ayırd etməyə imkan verir.
Qurğunu hazırlayan mühəndislər hesab edirlər ki, “RF-Capture” tək yaşayan yaşlı insanlara yardım baxımından xüsusilə faydalıdır. Çünki qurğu insanın yıxıldığını dərhal görüb başqalarını köməyə çağırmaq üçün lazımi məlumatları ötürə bilər.
Tədqiqatçılar alınan təsviri daha keyfiyyətli etmək üçün iş aparacaqlarını vəd ediblər.
