Gənc müəlliflərin kitablarının təqdimatı olub
Bakı Beynəlxalq Multikulturalizm Mərkəzində “İstedadlı insanlara dəstək olmaqla onların ictimaiyyətə tanıdılması üçün yeni imkanların yaradılması” layihəsi çərçivəsində çap olunmuş dörd kitabın təqdimat mərasimi keçirilib.
AZƏRTAC xəbər verir ki, oktyabrın 29-da reallaşan təqdimat mərasimi Prezident yanında Qeyri-Hökumət təşkilatlarına Dövlət Dəstəyi Şurasının və Azərbaycan Yaradıcılıq Fondunun birgə təşkilatçılığı ilə baş tutub.
Tədbirdə Azərbaycan Yaradıcılıq Fondunun aparat rəhbəri Qismət Rüstəmov gənc yazarlar Ömər Xəyyam və İkinci Mahmud, gənc şairlər Fəridə Məmmədova və Alikin kitablarının layihə çərçivəsində çapdan çıxmış ilk nəşrlər olduğunu diqqətə çatdırıb.
Daha sonra Millətlərarası, Multikulturalizm və Dini Məsələlər üzrə Dövlət Müşavirliyi Xidmətinin əməkdaşı Sərraf Hüseynov layihənin əhəmiyyətindən söz açaraq bildirib ki, istedadlı gənc yazarların və şairlərin Azərbaycan Yaradıcılıq Fondunda yer almaları və yeni imzalarla cəmiyyətə tanınmaları sevindirici haldır.
Tədbirdə gələcəkdə layihə çərçivəsində müxtəlif istedadlı gənclərin cəmiyyətə təqdim olunması və istedadlarının üzə çıxarılması istiqamətində Azərbaycan Yaradıcılıq Fondunun görəcəyi işlərdən söz açılıb.
Sonda layihə çərçivəsində nəşr edilmiş “Sayrışan hallar” (Ömər Xəyyam), “Ümid arısı”(İkinci Mahmud), “Sevgili üçün notlar” (Fəridə Məmmədova), “Günəş qalib gəldi” ( Alik) kitabları iştirakçılara təqdim olunub.
