Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov Böyük Britaniyanın sabiq baş naziri Toni Bleyerin dediklərinə münasibət bildirib.

Novator.az xəbər verir ki, Novruz Məmmədov oktyabrın 26-da “Tvitter” şəbəkəsində yazıb: “Deyirlər Bleyer “səhvinə” görə üzr istəyib. Amma bu nə birinci “səhvdir”, nə də sonuncu. Bundan da böyük “səhvlər” olub.

Son illərdə Qərbdə rəhbərlərin belə səhvlərinin sayı-hesabı yoxdur. Dünyanı indiki vəziyyətə salan elə bu bilə-bilə edilən səhvlərdir”.

Bugünlərdə Toni Bleyer ABŞ-ın İraqa hərbi müdaxiləsi zamanı baş vermiş səhvə görə üzr istəyib. CNN-ə müsahibəsində o bildirib ki, bu müdaxilə bu gün regionda hazırkı münaqişələrin yaranmasına yol açıb və həmin münaqişələrdən biri də İŞİD qruplaşmasının İraq və Suriyada nüfuzunu genişləndirməsidir.

“2003-cü ildə Səddamı hakimiyyətdən devirdik. İndi 2015-ci ildəki vəziyyətə görə deyə bilmərik ki, heç birimiz məsuliyyət daşımırıq. Kütləvi qırğın silahlarına dair qeyri-dəqiq məlumatın hərbi müdaxiləyə səbəb olmasına baxmayaraq, planlaşdırmada bəzi yanlışlıqlar və rejimi aradan qaldırandan sonra orada baş verəcək hadisələri anlamağa dair səhvlərimiz də olub” deyən Bleyer müharibəyə tam üzr istəməyib.

O qeyd edib ki, İraq lideri Səddam Hüseyni devirməyə görə üzr istəmək çətindir: “Hətta 2015-ci ildə də onun orada olmaması, olmasından daha yaxşıdır”.

“Amerikanın səs” xəbər verir ki, İraqa müdaxilədə Britaniya ən çox qüvvə göndərən ikinci ölkə olub – 45 min. Onlar 150 minlik ABŞ qüvvəsi ilə yanaşı, 7 min əsgərlə təmsil olunan Avstraliya, İspaniya və Polşaya qoşulub. Münaqişə zamanı Britaniyanın 179 əsgəri həlak olub.