Bakı Forumuna hazırlıq gedir: prezidentlərlə görüşlər keçirilib
IV Qlobal Bakı Forumuna hazırlıqla əlaqədar Balkan ölkələrində görüşlər keçirilib.
Diasporla İş üzrə Dövlət Komitəsinin mətbuat xidmətindən Novator.az-a verilən məlumata görə, Monteneqro prezidenti Filip Vuyanovic, Xorvatiya зrezidenti Kolinda Kitaroviç foruma hazırlıq məqsədilə Balkan ölkələrində səfərdə olan Nizami Gəncəvi Beynəlxalq Mərkəzinin nümayəndəsini qəbul edib.
Səfər çərçivəsində eyni zamanda Xorvatiyanın sabiq prezidentləri Stepan Mesiç və İvo Yosipoviçlə də görüşlər keçirilib.
Görüşlərdə oktyabrın 9-10-da Bolqarıstanda təşkil edilmiş ali səviyyəli toplantının nəticələri müzakirə edilib. Bundan başqa, IV Qlobal Bakı Forumu və toplantıda müzakirəyə çıxarılacaq məsələlərlə bağlı fikir mübadiləsi aparılıb, Nizami Gəncəvi Beynəlxalq Mərkəzinin Avropanı və dünyanı narahat edən mövzuların müzakirə ediləcəyi qlobal bir platforma yaratmasının əhəmiyyəti vurğulanıb. Monteneqro və Xorvatiya prezidentləri təşkilatın növbəti ali səviyyəli toplantılarının öz ölkələrində keçirilməsini təklif ediblər.
Qlobal Bakı Forumu Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə keçirilir.
IV Qlobal Bakı Forumunun 2016-cı ilin martında keçirilməsi planlaşdırılır.
