Azərbaycanda əhalinin 75 faizi internet istifadəçisidir
Azərbaycanda əhalinin hər 100 nəfərinə düşən telefon aparatlarının sayı 18.65 ədəd, hər 100 ailəyə düşən telefon aparatlarının sayı isə 69.01 ədəd təşkil edir. Hazırda ölkədə hər 100 nəfərə düşən mobil abunəçilərin sayı 112-yə bərabərdir. Məlumatı Rabitə və Yüksək Texnologiyalar Nazirliyi açıqlayıb.
Məlumata görə, ölkə üzrə əhalinin 75%-i internet, 65%-i isə genişzolaqlı internet istifadəçisidir. Həmçinin ev təsərrüfatlarının 58.3%-də kompüteri var və ev təsərrüfatlarının 75.2%-nin internetə çıxışı var. Evdə əhalinin 70.6%- internetə genişzolaqlı xətlə, 25.4%-i mobil telefonla, 3.7%-i modem (dial-up) vasitəsilə qoşulur.
Nazirliyin məlumatında deyilir ki, son 5 ildə genişzolaqlı xətlə qoşulma 18 dəfə artıb, dial-up qoşulma isə 13 dəfə azalıb. İnternet və genişzolaqlı internet istifadəçiləri göstəricilərinə görə Azərbaycan dünya orta göstəricisini təqribən 2 dəfə qabaqlayır.
