Astara Pedaqoji Kollecində “Milli mənəvi dəyərlərimiz və erkən nikahlar” mövzusunda maarifləndirici tədbir keçirilib.

AZƏRTAC xəbər verir ki, Astara Rayon Gənclər və İdman İdarəsinin və təhsil şöbəsinin birgə təşkilatçılığı ilə keçirilən tədbirdə gənclər və idman idarəsinin aparıcı məsləhətçisi Aysel Cəbiyevanın mövzu ilə bağlı məruzəsi dinlənilib.

Tədbirdə ailə məsələlərində ciddi problemlərdən birinin də erkən nikah olması ilə bağlı fikirlər səsləndirilib. Mövzu ətrafında aparılan diskussiyalarda vurğulanıb ki, ailə quran tərəflərin bəzən yaşlarının rəsmi nikah üçün müəyyən olunmuş yaş həddindən aşağı olması ailədə bir sıra problemlər yaradır. Bu kimi ailələrdə nikahın pozulması, xəstə uşaqların dünyaya gətirilməsi, məişət zorakılığı, fiziki-psixoloji çətinliklər kimi hallar daha çox müşahidə olunur. Erkən nikahların pozulması zamanı qadınlar daha çətin vəziyyətdə qalırlar.

Toplantıda müzakirə edilən məsələ ilə bağlı tələbələr təkliflərini bölüşüblər.