Qəbələdə qətl törətmiş dəstənin daha iki üzvü tutulub
Daxili İşlər Nazirliyinin və Baş Prokurorluğun mətbuat xidmətləri Qəbələ şəhər sakini Vahid Vahabovun ölümünün istintaqı ilə bağlı yeni açıqlama yayıb.
Novator.az xatırladır ki, Vahid Vahabov 2014-cü ildə odlu silahla öldürülüb. Onun meyiti noyabrın 24-də yaşadığı evdə aşkarlanıb. Fakt üzrə Cinayət Məcəlləsinin müvafiq maddələri ilə cinayət işi başlayıb.
Araşdırmalarla müəyyən edilib ki, Vahid Vahabovun qonşusu Coşqun Kərimbəyli onun imkanlı şəxs olduğu barədə yaxın dostlarına – radikal ekstremist yönümlü dini təriqət üzvləri olan, əvvəllər məhkum edilmiş Nurəddin Xəlilova, Müşfiq Mikayılova, Rəşad Həşimliyə və Əhməd Kərimova məlumat verib. Onlar həmin gün oğurladıqları avtomobillə Qəbələ şəhərinə gedərək, gecə saatlarında Vahid Vahabovun yaşadığı mənzilə daxil olub, onu odlu silahla öldürüb, həyat yoldaşına isə müxtəlif dərəcəli xəsarətlər yetiriblər.
Daxili İşlər Nazirliyinin və Baş Prokurorluğun mətbuat xidmətlərinin yaydığı birgə məlumatda bildirilir ki, aparılan əməliyyat-axtarış tədbirləri nəticəsində cinayətkar dəstənin bir çox üzvləri məsuliyyətə cəlb olunublar.
Daxili işlər və prokurorluq orqanlarının əməkdaşları tərəfindən həyata keçirilmiş tədbirlərlə həmin qətlin və bir sıra digər ağır cinayətlərin təşkilatçılarından və fəal iştirakçılarından olan, mütəşəkkil cinayətkar qrupun istintaqdan yayınan daha iki üzvü – Coşqun Kərimbəyli və Əhməd Kərimov müəyyən edilərək yaxalanıblar. Bununla da cinayətkar dəstənin həbs edilən üzvlərinin sayı 18 nəfərə çatıb.
Hazırda iş üzrə zəruri istintaq hərəkətləri və əməliyyat-axtarış tədbirləri davam etdirilir.
