“Yandex. Navigator” gizlicə səs yazırmış
Mobil telefonlardakı “Yandex. Navigator” proqramı istifadəçinin xəbəri olmadan onun bütün danışıqlarını yaza bilirmiş.
“Yandex. Navigator” proqramı telefonlara “Android” mexanizmi ilə quraşdırılır.
Novator.az xəbər verir ki, proqramın casusluq fəaliyyətini “Facebook” sosial şəbəkəsinin istifadəçisi Yevgeni Strokin aşkarlayıb. Yevgeni naviqatorun bu yaxınlarda yenilənmiş versiyasının mikrofona düşən hər biri səsi gizlicə yaddaşa yazdığını anlayıb. O, “Facebook”da bununla bağlı bildirib: “Bu gün telefonumun SD kartı yaddaşın azaldığı haqda xəbərdarlıq etdi. Çox təəccübləndim və yoxlamağa başladım. Məlum oldu ki, onun kökündə informasiyaları aktiv şəkildə yazan hansısa “stream.wav” adlı fayl var. Qulaq asanda son 2 gün ərzində baş verən bütün hadisələrin, danışıqların telefonumun mikrofonundan ora yazıldığını eşitdim”.
“Yandex”in işçi komandası bu məsələyə dərhal reaksiya verib. Şirkət ona məxsus naviqasiya proqramında ciddi problemlərin olduğunu etiraf edib və istifadəçinin aşkarladığı səhvi aradan qaldırıb. Məlum olub ki, proqram mikrofonu daim açıq saxlayırmış və bütün səsləri lokal fayla yazırmış.
Hazırda “Google Play”də əlavənin düzəldilmiş versiyası təqdim olunub.
