Ukrayna Daxili İşlər Nazirliyinin Kiber Cinayətkarlığa Qarşı Mübarizə İdarəsinin rəisi Sergey Demedyuk sentyabrın 10-da keçirdiyi brifinqdə ölkə banklarının saytlarına olan hücumlardan danışıb.

Novator.az xəbər verir ki, Demedyuk Ukraynadakı bankların saytlarının hər gün DDoS tipli haker hücumlarına məruz qaldığını deyib. İdarə rəisi bildirib ki, Ukrayna bankları köhnə əməliyyat sistemlərindən istifadə etdiklərinə görə haker hücumundan ziyan görür.

Demedyukun sözlərinə görə, yayın əvvəlində haker hücumu üsulu ilə banklardan birinin hesabından 22 milyon qriven oğurlanıb. DİN rəsmisi həmin cinayətin Ukrayna ərazisindən törədildiyini qeyd edib.

Demedyuk haker hücumlarının həm də bank mühasiblərinin və idarə  rəhbərlərinin ehtiyatsızlığından, yəni sistemə kənardan daxil olmaları ucbatından baş verdiyini vurğulayıb.