“Wi-Fi” və “Bluetooth” ləğv oluna bilər
Kaliforniyalı fiziklər elektron cihazlar arasında rabitə yaratmaq üçün maqnit sahəsindən və insan bədənindən istifadə etməyi mümkün sayırlar. Bu yenilik gələcəkdə “Wi-Fi” və “Bluetooth” kimi şəbəkələrdən imtinaya gətirib çıxaracaq.
Novator.az xəbər verir ki, Kaliforniya Univeristetindən Patrik Merse və həmkarları yeni ixtiranı İtaliyanın Milan şəhərində tibb və biologiya sahəsində mühəndis texnologiyaları mövzusunda keçirilən konfransda təqdim ediblər. İxtira insan bədənindən keçən siqnalı indiki cihazlardan milyon dəfə yaxşı qəbul etməyə imkan verir.
“Ağıllı saatlar”ın və digər bu kimi daşınan cihazların batareyaları kiçik olduğundan tutumu da azdır, enerjisi tez boşalır, onları tez-tez doldurmaq lazım gəlir. Kaliforniyalı fiziklərin təqdim etdikləri ixtirada isə maqnit rabitə sistemi enerjidən az istifadəyə imkan yaradır.
“Wi-Fi” və “Bluetooth” şəbəkələri vasitəsilə informasiya ötürüləndə insan bədəni maneəyə çevrilir. Yeni ixtirada isə informasiya mübadiləsi zamanı insan bədəni maneə deyil, maqnit dalğalarını ötürən bir mühit rolunu oynayır. İnformasiya bu mühitin köməyilə ötürülür.
“Maqnit Wi-Fi” sisteminin daha bir üstünlüyü onun təhlükəsizliyindədir. Kiber cinayətkarlar üçün “Wi-Fi” və “Bluetooth”u sındırmaq asandır. Yeni ixtira bunun qarşısını alır. Çünki maqnit dalğaları bədəni tərk etmir və hakerlər insana toxunmasalar onu izləyə bilməzlər.
