Türkiyə “delete”i silir
Türkiyənin elm, sənaye və texnologiya naziri Fikri İşıq yeni qəbul edilmiş “F klaviatura standartı” nəticəsində Türkiyədə kompüter klaviaturalarında bütün düymələrin türkcə olacağını bildirib.
Novator.az-ın məlumatına görə, nazir deyib ki, yeni klaviaturalarda bütün düymələrin türkcə olması qərarını Türk Standartları İnstitutu (TSE) qəbul edib.
Nazir Türkiyədə kompüter klaviaturalarında bundan sonra “delete” yerinə “sil”, “enter” yerinə “giriş”, “print screen” yerinə “ekranı kopyala” sözləri yazılmış düymələrin yer alacağını bildirib.
Fikri İşıq klaviaturadakı düymələrin üstünə onların funksiyalarının türkcə yazılmasını buna yaranmış böyük tələbatla əsaslandırıb.
Nazir qeyd edib ki, yeni versiya indiki nəsil üçün türk dilinin doğru və yerində istifadəsi baxımından böyük əhəmiyyət kəsb edir.
