“Regional Gender” Mərkəzi İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Məişət zorakılığının baş verməsinin sosial köklərinin araşdırılması və problemin aradan qaldırılma yollarının ictimai müzakirəsinin keçirilməsi” layihəsinin icrasını başa çatdırsa da, məlumatlandırma könüllü qrup vasitəsilə davam etdirilir.

İctimai Birlikdən AZƏRTAC-a bildiriblər ki, mərkəzin ofisində “Məişət zorakılığı və onu doğuran səbəblər” mövzusunda təlim keçirilib.

Tədbiri giriş sözü ilə birliyin sədri Şərqiyyə Dadaşova açıb, təmsil etdiyi təşkilatın erkən evlilik, məişət zorakılığı kimi həssas məsələlərlə bağlı hər zaman maarifləndirmə işləri apardığını diqqətə çatdırıb və hamını məişət zorakılığına qarşı təşəbbüsləri dəstəkləməyə və bu istiqamətdə birgə mübarizəyə səsləyib.

Sonra mövzu ətrafında çıxışlar dinlənilib, geniş müzakirələr aparılıb, iştirakçıları maraqlandıran suallar cavablandırılıb.