Nazir Əli Abbasov “Microsoft” şirkətinin vitse-prezidentini qəbul edib
Azərbaycanın rabitə və yüksək texnologiyalar naziri Əli Abbasov “Microsoft” şirkətinin vitse-prezidenti, dövlət sektoru ilə iş üzrə rəhbəri Trudi Norris-Qreylə görüşüb.
Novator.az Rabitə və Yüksək Texnologiyalar Nazirliyinə istinadla xəbər verir ki, görüşdə Azərbaycanda “Microsoft” şirkətinin mövcud əlaqələri və perspektiv əməkdaşlıq istiqamətləri müzakirə edilib.
“Microsoft” şirkəti ilə bulud texnologiyaları, kibertəhlükəsizlik, elektron hökumət sahələri üzrə əməkdaşlıq məsələləri müzakirə olunub.
Qeyd edilib ki, Azərbaycanda TIER 3 səviyyəli Data Mərkəz vasitəsilə “Microsoft” şirkətinin bulud texnologiyaları əsasında yeni xidmətlərin tətbiqi üzrə tədbirlərin görülməsi nəzərdə tutulur.
Sonda tərəflər bu ilin dekabr ayında Azərbaycanda keçiriləcək “BakuTel-2015” sərgi-konfransında “Microsoft” şirkətinin iştirakı məsələsini müzakirə ediblər.
