Kanadanın “AshleyMadison” tanışlıq saytı hakerlərin hücumuna məruz qalıb.

Novator.az xəbər verir ki, hakerlər saytın məlumat bazasına girib istifadəçilər haqda informasiyaları ələ keçiriblər, üstəlik, həmin informasiyaları avqustun 19-da internetdə yerləşdiriblər.

Onlar tanışlıq saytından istifadə edənlərin adlarını, ünvanlarını, hətta telefon nömrələrini də dərc ediblər. Ümumilikdə hakerlər ABŞ-ın “.mil” və “.gov” domenlərində açılmış 15 min poçt ünvanını yayıblar.

Oğurlanmış məlumat bazasında 10 qiqabayt informasiya olub.

“AshleyMadison” tanışlıq saytının 37 milyon nəfər istifadəçisi olduğu bildirilir.

Haker hücumu tanışlıq portalının sahiblərinin möhtəkirliyini də üzə çıxarıb. Sən demə, portalın idarəçiləri istifadəçilərə bildirirmiş ki, kim istəsə ödəniş edib özü haqda məlumatları saytın bazasından tam silə bilər. Amma haker hücumu göstərib ki, ödəniş etmiş istifadəçilər haqda informasiyalar məlumat bazasında – arxivdə qalırmış.

“AshleyMadison” saytı hakerləri cinayətkar adlandırıb.

Haker hücumunu “İmpact Team” qruplaşması öz üzərinə götürüb. Bu qrupun üzvləri saytı şəxsi məlumatları yaymaqla hədələyərək onun bağlanmasını tələb edirmişlər. Amma portal buna məhəl qoymayıb.