Plastik kartlardan tamam imtina olunacaq
“Samsung Electronics” şirkəti öz mobil ödəmə sistemini istifadəyə verib. “Samsung Pay” adlı xidmət hələ ki Koreya Respublikasında əlçatandır. Amma yaxın gələcəkdə bu xidmətdən dünyanın bir çox ölkələrində yararlanmaq mümkün olacaq.
AZƏRTAC “dailycomm.ru” saytına istinadla xəbər verir ki, “Samsung Pay” istifadəçiləri aldığı məhsulların dəyərini ödəmək üçün öz smartfonlarını mağazanın kassasındakı qurğuya yaxınlaşdırmalıdır. “Galaxy S6”, “Galaxy S6 Edge”, “Galaxy S6 Edge+” və “Galaxy Note 5” smartfonları yeni xidməti dəstəkləyir. Əsas şərt odur ki, xidmətə inteqrasiya edilmiş ödəmə kartı “Samsung Pay” servisini dəstəkləyən bank tərəfindən verilməlidir.
“Samsung Pay” xidmətinin yaradıcıları əmin edirlər ki, ənənəvi bank əməliyyatlarının əksəriyyətində bu texnologiyadan istifadə etmək mümkün olacaq. Nəticədə isə bu, yaxın gələcəkdə plastik kartlardan tamamilə imtinaya səbəb olacaq.
