300-dən çox məcburi köçkün müavinətdən imtina edib
Fevralın 2-də Qaçqınların və Məcburi Köçkünlərin İşləri üzrə Dövlət Komitəsi rəsmi açıqlama yayıb. Açıqlamada qeyd olunur ki, komitəyə müraciət etmiş bəzi məcburi köçkünlər ailələrini dolandırmaq imkanına malik olduqlarını, sahibkarlıq fəaliyyəti ilə məşğul olduqlarını, yüksək vəzifədə çalışdıqlarını əsas gətirərək vahid aylıq müavinətdən könüllü olaraq imtina etdiklərini bildirir və bu vəsaitin daha ağır vəziyyətdə yaşayanlara verilməsini, həmçinin aylıq müavinətin məbləğinin gələcəkdə artırılmasına yönəldilməsini təklif edirlər. Əraziləri işğal olunmuş 10 rayondan bu günədək 300-dən çox belə müraciət daxil olduğu bildirilir.
Novator.az xatırladır ki, bu il yanvarın 1-dən məcburi köçkünlər üçün yemək xərci müavinəti, kommunal və digər xidmətlər üzrə dövlət büdcəsindən ödənişlər əvəzinə 36 manat məbləğində vahid aylıq müavinət müəyyən edilib. Müavinət Nazirlər Kabinetinin təsdiq etdiyi qayda əsasında verilir.
2017-ci ilədək qüvvədə olmuş qayda ilə məcburi köçkünə yemək xərci üçün verilən aylıq müavinət (çörəkpulu) 18 manat 50 qəpik idi. Məcburi köçkün ayda 150 kilovat-saat elektrik enerjisini (10 manat 50 qəpik), orta hesabla 45 kubmetr təbii qazı (3 manat 50 qəpik) pulsuz işlədirdi. Dövlət məcburi köçkünə ayda 5 kubmetr həcmində su və tullantı sularının axıdılması xidmətini (2 manat 50 qəpik) pulsuz göstərirdi. Məcburi köçkün telefondan istifadə haqqına görə aylıq 2 manat 50 qəpik ödənişdən də azad idi.
Ümumi hesablama apardıqda əvvəlki qayda ilə məcburi köçkünə ayda 37 manat 50 qəpik güzəşt düşürdü.
