Fələstini tanımayan ölkələr
Novator.az Fələstin Dövlətini tanımayan ölkələrin siyahısına nəzər salıb.
Birləşmiş Millətlər Təşkilatı (BMT) 1947-ci ildə Fələstin torpaqlarının bölünərək ərazidə İsrail və Fələstin dövlətlərinin qurulması barədə qətnamə çıxarıb. 1948-ci ildə yaradılan İsrail 1949-cu ildə BMT-yə qəbul edilib. Fələstin 1988-ci ildə müstəqil dövlət elan olunub, 2012-ci ildə BMT-də müşahidəçi statusu alıb.
BMT-nin Fələstinə ayırdığı ərazilərin xeyli hissəsi, o cümlədən paytaxt kimi nəzərdə tutulmuş Şərqi Qüds (Yerusəlim) İsrailin işğalındadır.
Sentyabrın 23-nə olan məlumata görə, BMT-nin 193 üzvünün 156-sı Fələstinin müstəqilliyini tanıyır.
BMT üzvü olmayan Vatikan və Qərbi Saxara da eyni qərarı veriblər.
İsrail və daha 36 BMT üzvü (ABŞ, Panama, Kamerun, Eritreya, Finlandiya, Niderland, Danimarka, Almaniya, Belçika, Andorra, İsveçrə, Avstriya, Lixtenşteyn, İtaliya, Xorvatiya, Şimali Makedoniya, Yunanıstan, Estoniya, Latviya, Litva, Moldova, Myanma, Sinqapur, Fici, Kiribati, Marşal adaları, Mikroneziya, Nauru, Palau, Samoa, Solomon adaları, Tonqa, Tuvalu, Yeni Zelandiya, Cənubi Koreya, Yaponiya), həmçinin BMT üzvü olmayan Kosovo, Tayvan və Malta ordeni bu addımı atmayıb.
