Çin: “məlumat qəhrəmanı”na yenə iş kəsilib
Koronavirus barədə ilk məlumatların əsas qaynaqlarından olmuş çinli jurnalist Çjan Çjana yeni hökm oxunub.
2019-cu ilin dekabrında Çində üzə çıxan yeni koronavirus infeksiyası dünyanı bürüyüb. 2020-ci il martın 11-dən 2023-cü il mayın 5-dək qlobal pandemiya elan olunan infeksiya 7 milyondan çox adamın ölümünə gətirib.
Versiyalardan birinə görə, virus Çinin Uhan şəhərindəki laboratoriyadan sızıb.
Novator.az bildirir ki, Çjan Çjan pandemiyanın ilk mərhələsində Uhan şəhərindən reportajlar hazırladığına görə 2020-2024-cü illərdə həbsdə yatıb.
Koronavirusun yayılmağa başladığı günlərdə Uhandakı xəstəxanalardan, küçələrdən birbaşa müşahidələrini paylaşan, hökumətin təqdim etdiyi rəsmi mənzərədən daha ağır tablo ortaya qoyan jurnalist 2020-ci ilin dekabrında “iğtişaş salmaq” ittihamı ilə tutularaq 4 il müddətinə azadlıqdan məhrum olunub.
2024-cü ilin mayında azadlığa çıxsa da, üç ay sonra o, yenidən tutulub.
2025-ci il sentyabrın 20-də Çjan Çjana daha 4 il həbs cəzası kəsilib. O, Çində insan haqlarının pozulması barədə paylaşdığı məlumatlara görə qəzəbə tuş gəlib.
Hüquq müdafiə qurumları bəyan edir ki, Çjan Çjan dünyada “məlumat qəhrəmanı” kimi tanınmalı idi, amma ağır şəraitdə həbsdə saxlanır.
Nyu-Yorkda yerləşən Jurnalistləri Müdafiə Komitəsi Çjan Çjanın həbsini əsassız saydığını bəyan edib və Çin hakimiyyətini jurnalistin təqibini dayandırmağa çağırıb.
Çin jurnalistlərin ən çox tutulduğu ölkə sayılır – hazırda azı 124 media işçisi həbsdədir.
Mənbə: NBCNews.com
