Fələstini tanıyan ölkələr artır
Sentyabrın 21-də Böyük Britaniya, Kanada və Avstraliya Fələstin Dövlətini tanıyıb. Novator.az bildirir ki, yaxın günlərdə Fransa, Portuqaliya, Belçika, Lüksemburq, Andorra, San Marino və Maltanın da eyni qərar verməsi gözlənir.
Hazırda BMT-nin 193 üzvünün 150-si Fələstinin müstəqilliyini tanıyır. Bu addımı atmayan ölkələr arasında İsraillə yanaşı bir çox ölkə, o cümlədən ABŞ, Panama, Kamerun, Finlandiya, Niderland, Monako, Danimarka, Almaniya, İsveçrə, Avstriya, Lixtenşteyn, İtaliya, Xorvatiya, Kosovo, Şimali Makedoniya, Yunanıstan, Estoniya, Latviya, Litva, Moldova, Myanma, Yeni Zelandiya, Cənubi Koreya, Yaponiya var.
1947-ci ildə BMT Fələstin torpaqlarının bölünərək ərazidə İsrail və Fələstin dövlətlərinin qurulmasına qərar verib. 1948-ci ildə yaradılan İsrail 1949-cu ildə BMT-yə qəbul edilib. Fələstin 1988-ci ildə müstəqil dövlət elan olunub, 2012-ci ildə BMT-də müşahidəçi statusu alıb.
BMT-nin Fələstinə ayırdığı ərazilərin xeyli hissəsi, o cümlədən paytaxt kimi nəzərdə tutulmuş Şərqi Qüds (Yerusəlim) İsrailin işğalındadır. 2023-cü il oktyabrın 7-də Fələstinin Qəzza bölgəsindən İsrail ərazilərinə hərbi müdaxilə olub, ardınca böyük savaş başlayıb, Qəzzanın böyük hissəsi tam dağıdılıb. Dünya ictimaiyyətinin bir hissəsi İsrailin cavab tədbirini çox amansız sayır, fələstinlilərin soyqırımına məruz qoyulduğunu iddia edir.
Mənbə: Reuters.com
