Ukrayna: büdcə gəliri qədər müdafiə xərci
Ukraynanın Nazirlər Kabineti 2026-cı ilin dövlət büdcəsi layihəsini təsdiqləyib. Novator.az bildirir ki, layihədə gəlir proqnozu 2,8 trilyon qrivna, xərc proqnozu 4,8 trilyon qrivna göstərilir.
Xərc istiqamətlərində ilk yeri 2,8 trilyon qrivna ilə müdafiə xərcləri tutur.
Pensiya təminatına 1 trilyon 27 milyard qrivna, sosial müdafiəyə 467,1 milyard qrivna, elm və təhsilə 285,3 milyard qrivna, səhiyyəyə 258 milyard qrivna ayırmaq nəzərdə tutulur.
2014-cü ilin fevralında Ukraynada Qərbə bağlı qüvvələr inqilab dalğasında hakimiyyətə gəlib. Rusiya dərhal ölkənin Krım yarımadasını zəbt edərək martın 18-də özünə birləşdirib, ardınca Donetsk və Luqansk vilayətlərinin bir hissəsini də tutaraq işğalçı rejimlər qurub. 2022-ci il fevralın 24-də Rusiya total hərbi əməliyyatlara başlayıb, oktyabrın 5-də Donetsk və Luqansk bölgələrini, eləcə də Zaporojye və Xerson vilayətlərini özünə birləşdirdiyini açıqlayıb. İşğalçı savaş başqa bölgələri də əhatə edib, ölkənin hər yanına dağıdıcı hücumlarla müşayiət olunur.
Mənbə: Ukrinform.net
