Statistikadan seçmələr
Dövlət Statistika Komitəsinin yanvar-avqust ayları üzrə hesabatına görə, Azərbaycanda kənd təsərrüfatı məhsulu 2024-cü ilin eyni dövrü ilə müqayisədə 0,8 faiz artıb, bitkiçilikdə 2,5 faiz geriləmə, heyvandarlıqda 1,1 faiz yüksəliş qeydə alınıb.
Nəqliyyat sektorunda yük daşınması üzrə artım 2,8 faiz, sərnişin daşınması üzrə 5,1 faiz göstərilir.
Açıqlamaya əsasən, informasiya və rabitə xidmətlərinin həcmində 7,3 faiz, ictimai iaşə dövriyyəsində real ifadədə 14 faiz, ödənişli xidmətlərin dəyərində real ifadədə 9 faiz artım rəsmiləşib.
Əhalinin gəlirlərinin nominal ifadədə 7,4 faiz artdığı, dövlət büdcəsinə 26 milyard 359,4 milyon manatın daxil olduğu, büdcədən 22 milyard 308 milyon manatın xərcləndiyi bildirilir.
Hesabata görə, sentyabrın 1-nə 5 milyon 84,8 min nəfər məşğul şəxs, 237 min nəfər işsiz qeydə alınıb.
Avqustun 1-nə muzdlu işçilərin orta aylıq nominal əməkhaqqı 1098,1 manata çatıb, neft-qaz sektorunda 3879,8 manat, qeyri-neft/qaz sektorunda 1046,4 manat, dövlət müəssisələrində 1066,9 manat, özəl müəssisələrdə 1129,2 manat olub. Dövlət Statistika Komitəsi orta aylıq maaşın ən yüksək olduğu iqtisadi fəaliyyət növlərini belə sıralayıb:
mədən sənayesi – 3692,5 manat;
maliyyə və sığorta fəaliyyəti – 3015,3 manat;
informasiya və rabitə – 1895,7 manat;
peşə fəaliyyəti, elmi və texniki fəaliyyət – 1852,6 manat;
nəqliyyat və anbar təsərrüfatı – 1546,4 manat;
dövlət idarəetməsi və müdafiə; sosial təminat – 1486,4 manat;
daşınmaz əmlakla əlaqədar əməliyyatlar – 1252,2 manat;
tikinti – 1159 manat;
elektrik enerjisi, qaz və buxar istehsalı, bölüşdürülməsi və təchizatı – 1102,2 manat.
Ölkədə minimum aylıq əməkhaqqı 400 manatdır.
