Litvada yeni hökumət
Litvada yeni hökumətin qurulması başa çatır. Novator.az-ın məlumatına görə, sentyabrın 9-da prezident Gitanas Nauseda baş naziri və 12 naziri təyin edib, yalnız ətraf mühit naziri və energetika naziri postları boş qalıb.
Ölkədə hökumət 141 yerlik parlamentə seçkinin nəticələri əsasında formalaşır. 2024-cü ilin oktyabrında keçirilmiş parlament seçkisində qalib gələn Sosial Demokrat Partiyası Neman Şəfəqi Partiyası və Demokratların Litva Uğrunda İttifaqı ilə koalisiyaya girib, dekabrda Gintautas Palutskas baş nazir kürsüsünə oturub. Adı korrupsiya qalmaqallarında hallandığına görə Gintautas Palutskas bu il iyulun 31-də istefa verib, həmçinin Sosial Demokrat Partiyasının sədrliyindən gedib, hökumət dağılıb.
Avqustun 26-da parlament prezidentin təqdimatını nəzərə alaraq Sosial Demokrat Partiyasının üzvü İnqa Ruginenenin baş nazir təyin olunmasına razılaşıb.
1981-ci il təvəllüdlü İnqa Ruginene əvvəlki hökumətdə əmək və sosial müdafiə naziri postunu tuturdu.
Yeni hökuməti Sosial Demokrat Partiyası, Neman Şəfəqi Partiyası, Kəndlilər və Yaşıllar İttifaqı qurub.
Mənbə: Delfi.lt
