Gürcüstan: müxalifətin bir parası parlamentə gəlir
Gürcüstanda 2024-cü il oktyabrın 26-da keçirilmiş parlament seçkisində hakim Gürcü Arzusu – Demokratik Gürcüstan Partiyası 150 mandatın 89-na sahib çıxmış, müxalif qurumlar – Yeniliklər koalisiyası 19, Birlik – Milli Hərəkat koalisiyası 16, Güclü Gürcüstan koalisiyası 14, Gürcüstan Uğrunda Partiyası 12 mandat almışdı.
Yeniliklər, Birlik – Milli Hərəkat, Güclü Gürcüstan koalisiyalarının təmsilçiləri mandatlardan rəsmən imtina edib, 2025-ci il fevralın 5-də parlament onların səlahiyyətinə xitam verib.
Gürcüstan Uğrunda Partiyasının deputatları isə parlamentin iclaslarını boykot ediblər və iyulun 2-də onlar mandatdan məhrum olunublar. Parlament proporsional üsulla seçildiyindən partiya siyahısındakı növbəti şəxslərin mandat almaq hüququ var. Sentyabrın 9-da yayılan məlumata görə, Gürcüstan Uğrunda Partiyasının 8 deputatı parlament sədrinə rəsmi müraciət edərək boykota son verdiklərini bildiriblər.
Gürcüstan Uğrunda Partiyasına sabiq baş nazir Georgi Qaxariya liderlik edir. 1975-ci il təvəllüdlü Georgi Qaxariya 2019-cu il sentyabrın 8-dən Gürcü Arzusunun təmsilçisi kimi hökumətə rəhbərlik edib, 2021-ci il fevralın 18-də müxalifətə təzyiqləri pisləyərək istefa verib, ardınca Gürcüstan Uğrunda Partiyasını yaradıb.
Gürcüstanda hökuməti parlamentdə azı 76 mandatı olan partiya qurur. 2012, 2016 və 2020-ci illərin parlament seçkilərində də Gürcü Arzusu qalib gəlib.
Novator.az bildirir ki, oktyabrın 4-ü Gürcüstanda merlər və yerli məclislər seçiləcək. Seçkilərdə 14 partiya iştirak edir.
Ölkədə prezidenti parlamentin deputatlarından, muxtar qurumların ali təmsilçi orqanlarının və yerli özünüidarəetmə qurumlarının nümayəndələrindən ibarət Seçicilər Kollegiyası seçir. 2024-cü il dekabrın 29-dan prezident postunu Gürcü Arzusuna bağlı Mixail Kavelaşvili tutur.
Mənbə: 1tv.ge
