Fransada yeni hökumət böhranı
Fransada yenidən hökumət böhranı yaranıb. Novator.az-ın məlumatına görə, sentyabrın 8-də parlamentin aşağı palatası – Milli Məclis hökumətə etimadsızlıq göstərib, bu isə Fransua Bayrunun baş nazir postundan istefası deməkdir.
Səsverməyə qatılan 558 deputatın cəmi 194-ü hökumətə dəstək verib. 577 yerlik Milli Məclisdə hökumətə bağlı qüvvələrin 210, müxaliflərin 353 mandatı var.
Fransada hökumət həm prezident seçkisinin, həm də Milli Məclisə seçkinin nəticələri əsasında formalaşır.
2017 və 2022-ci illərdə Emmanuel Makron prezident seçilib. Dövlət başçısının İntibah Partiyası və müttəfiqləri Milli Məclisə 2024-cü il iyunun 30-u və iyulun 7-də keçirilmiş seçkidən sonra azlıq hökuməti qurublar, sentyabrın 5-dən Mişel Barnye baş nazir postunu tutub. Həmin il dekabrın 4-də Milli Məclis hökumətə etimadsızlıq göstərib, dekabrın 13-də Fransua Bayru baş nazir kürsüsünə oturub.
Fransua Bayru sosial xərcləri azaltmaq cəhdlərinə görə müxalif qüvvələrin qəzəbinə gəlib.
Səlahiyyət müddəti 5 il olan Milli Məclis dairələr üzrə seçilir.
Mənbə: Theguardian.com
