Ukraynada sorğu: güzəşt, ya döyüş?
Ukraynalıların 59 faizi hərbi əməliyyatların dayanmasına və ölkənin təhlükəsizliyinə beynəlxalq təminat verilməsi şərti ilə güzəştlərə hazırdır. “Reytinq” sosiologiya qrupunun keçirdiyi sorğunun nəticələri belə göstərir.
Novator.az bildirir ki, hesabata görə, respondentlərin 20 faizi ərazilər tam azad edilənə qədər, 13 faizi cəbhə xəttində 24 fevral 2022-ci ilə olmuş durum bərpa edilənə qədər döyüşməyə tərəfdardır.
Sorğuya qatılanların 82 faizi müharibənin danışıqlar yolu ilə bitməsini mümkün sayır, onların 62 faizi beynəlxalq tərəfdaşları cəlb etməklə, 20 faizi Rusiya ilə birbaşa danışıqlarla güzəştlərə razılaşır.
Respondentlərin 75 faizi yalnız təhlükəsizliyə etibarlı təminat verilməsi halında atəşkəs istəyir, bunun üçün Ukrayna silahlı qüvvələrinin maliyyələşdirilməsini və silah-sursatla təchizatını, təkrar hücum halında müttəfiqlərin müharibəyə qoşulması öhdəliyi götürməsini, dəniz və hava məkanının beynəlxalq nəzarətə alınmasını vacib sayır.
2014-cü ilin fevralında Ukraynada Qərbə bağlı qüvvələr inqilab dalğasında hakimiyyətə gəlib. Rusiya dərhal ölkənin Krım yarımadasını zəbt edərək martın 18-də özünə birləşdirib, ardınca Donetsk və Luqansk vilayətlərinin bir hissəsini də tutaraq işğalçı rejimlər qurub. 2022-ci il fevralın 24-də Rusiya total hərbi əməliyyatlara başlayıb, oktyabrın 5-də Donetsk və Luqansk bölgələrini, eləcə də Zaporojye və Xerson vilayətlərini özünə birləşdirdiyini açıqlayıb.
İşğalçı savaş başqa bölgələri də əhatə edib, ölkənin hər yanına dağıdıcı hücumlarla müşayiət olunur. Rusiya müharibəni dayandırmaq üçün Ukraynanın təslim olmasını, Donetsk, Luqansk, Zaporojye və Xerson vilayətlərində ələ keçirə bilmədiyi ərazilərin boşaldılmasını, bu bölgələrin, eləcə də Krımın onun torpağı kimi tanınmasını istəyir.
Mənbə: Ratinggroup.ua
