Üç turnir, 108 komanda
UEFA-nın klub turnirlərinin 2025-2026 mövsümündə ələmələr bitib, Rusiyanın buraxılmadığı yarışlarda 15 ölkə təmsilçisiz qalıb, İngiltərə, İtaliya, İspaniya, Almaniya, Fransa, Niderland və Polşa itki verməyib.
Reqlamentə görə, Çempionlar Liqası, Avropa Liqası və Konfrans Liqasının hər birinin liqa mərhələsində 36 komanda yarışır, ilk 8 pilləni tutanlar birbaşa 1/8 finala çıxır, 9-24-cü yerləri tutanlar 1/16 finalda mübarizə aparır. Konfrans Liqasında liqa mərhələsi 6, Çempionlar Liqası və Avropa Liqasında 8 turdan ibarətdir.
Azərbaycan təmsilçisi “Qarabağ” Çempionlar Liqasında yer alır. Komanda liqa raundunda “Çelsi”, “Ayntraxt” (Frankfurt), “Ayaks” və “Kopenhagen”lə evdə, “Liverpul”, “Benfika”, “Napoli” və “Atletik”lə səfərdə oynayacaq.
1955-ci ildən keçirilən, 1992-ci ilə qədər Çempionlar kuboku adlanmış Çempionlar Liqasında “Real” 15, “Milan” 7, “Bavariya” və “Liverpul” 6, “Barselona” 5, “Ayaks” 4, “İnter” (İtaliya) və “Mançester Yunayted” 3, “Benfika”, “Nottingem Forest”, “Yuventus”, “Portu” və “Çelsi” 2, “Seltik”, “Feyenoord”, “Aston Villa”, “Hamburq”, “Styaua”, PSV, “Srvena Zvezda”, “Marsel”, “Borussiya” (Dortmund), “Mançester Siti” və PSJ 1 titula sahibdir.
1971-ci ildən keçirilən, 2009-cu ilədək UEFA kuboku adlanmış Avropa Liqasında “Sevilya” 7, “Tottenhem”, “Liverpul”, “Yuventus”, “İnter” (İtaliya) və “Atletiko” 3, “Feyenoord”, “Borussiya” (Mönhenqladbah), “Ayntraxt” (Frankfurt), “Höteborq”, “Real”, “Parma”, “Portu” və “Çelsi” 2, PSV, “İpsviç”, “Anderlext”, “Bayer”, “Napoli”, “Ayaks”, “Bavariya”, “Şalke”, “Qalatasaray”, “Valensiya”, SSKA (Rusiya), “Zenit”, “Şaxtyor” (Ukrayna), “Mançester Yunayted”, “Vilyarreal” və “Atalanta” 1 uğur qazanıb.
2021-ci ildən keçirilən Konfrans Liqasını “Roma”, “Vest Hem”, “Olimpiakos” və “Çelsi” 1 dəfə udub.
Azərbaycan 55 üzvü olan UEFA-nın klub reytinqində 26-cı pillədədir. Reytinq klub turnirlərinin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 3,875 əmsal əldə edib.
