Çinli alimin ABŞ-da əməliyyatları – “Foks Nyus”
ABŞ-ın Texas Universitetində, Anderson adına Onkoloji Mərkəzdə çalışan çinli alim Yunhay Li mühüm tədqiqat materiallarını qanunsuz yolla Çinə keçirmək cəhdində günahlandırılır. Novator.az “Foks Nyus” (“Fox News”) kanalına istinadla xəbər verir ki, 35 yaşlı alim iyulun əvvəllərində Hyuston hava limanından Çinə uçmaq istəyərkən tutulub. Yoxlama zamanı ona məxsus əşyalardan ABŞ Müdafiə Nazirliyinin səhiyyə sahəsində maliyyələşdirdiyi layihələrə aid məxfi məlumatlar aşkarlanıb.
İstintaqı Texas ştatının Harris Dairəsi Prokurorluğu aparır. Yunhay Liyə kommersiya sirrini oğurlama, rəsmi sənədləri mənimsəmə ittihamları irəli sürülüb. Təqsiri sübuta yetirilsə, çinli alim 2 ildən 10 ilədək azadlıqdan məhrum edilə və 10 min dollar cərimələnə bilər.
İddiaya görə, Yunhay Li 2022-ci ildən çalışdığı Onkoloji Mərkəzdə bir xeyli məxfi məlumatı “Google” sistemində fərdi hesabına yükləyib. Onkoloji Mərkəzin rəhbərliyi bundan xəbər tutanda o, faylları silib, amma alimin materialları Çindəki serverə köçürdüyü üzə çıxıb. Söhbət dərc olunmamış elmi məqalələrdən, hələ yayılmamış, məxfi saxlanan bir sıra bilgilərdən, müalicə modellərindən və digər tədqiqat materiallarından gedir.
İstintaqın açıqlamasına əsasən, alim ABŞ-da işlədiyi müddətdə Çindəki elm fondundan da maliyyə dəstəyi alıb və Çuntsin Tibb Universiteti ilə əməkdaşlıq edib, amma bunu Anderson adına Onkoloji Mərkəzdən gizlədib.
“Foks Nyus” xəbər verir ki, təxminən bir ay istintaq təcridxanasında saxlanandan sonra Yunhay Li 5100 dollar girov qoyaraq ABŞ-ı tərk etməmək şərti ilə sərbəst buraxılıb, onun pasportu əlindən alınıb.
Mənbə: Foxnews.com
