Almaniyada yeni təhlükəsizlik qurumu
Almaniyada yeni qurum – Milli Təhlükəsizlik Şurası yaradılıb. Novator.az bildirir ki, avqustun 27-də elan olunan şura müdafiə siyasəti və silah ixracına məsul Federal Təhlükəsizlik Şurası və böhran hallarında qərarlara məsul Təhlükəsizlik Nazirləri Kabinetinin birləşməsi ilə qurulub. Qərar müdafiə və təhlükəsizlik məsələləri üzrə yüksək səviyyəli məsləhətləşmələri asanlaşdırmaq zərurəti ilə əsaslandırılıb.
Kansler və 9 nazirin daxil olduğu Milli Təhlükəsizlik Şurasının işinə zəruri hallarda təhlükəsizlik və kəşfiyyat qurumlarının rəsmiləri, ekspertləri, federal torpaqların (vilayətlərin) təmsilçiləri, həmçinin Almaniyanın üzv olduğu NATO və Avropa İttifaqının nümayəndələri cəlb ediləcək.
16 vilayətdən ibarət Almaniya Federativ Respublikasında hökuməti parlamentdə (Bundestaq) çoxluq təşkil edən qüvvə formalaşdırır. Hazırda Xristian Demokrat və Xristian Sosial ittifaqları ilə Sosial Demokrat Partiyasının koalisiyası hakim qüvvədir. Xristian Demokrat İttifaqının lideri Fridrix Merts hökumət başçısı – kanslerdir.
Dövlət başçısını – prezidenti parlamentin deputatları və bölgələrin nümayəndələrindən ibarət Federal Məclis seçir. 2017 və 2022-ci illərdə Frank-Valter Ştaynmayer prezident mandatı alıb.
Mənbə: Euractiv.com
