Trampdan razılıq göstəriciləri
Respublikaçıların 87 faizi, demokratların 5 faizi, partiyasızların 28 faizi ABŞ prezidenti Donald Trampın işindən razıdır. Novator.az-ın məlumatına görə, “Economist/YouGov” şirkətinin apardığı sorğunun nəticələri belə göstərir. 15-18 avqustda keçirilmiş sorğuya 1568 amerikalının qatıldığı, onların 40 faizinin Donald Trampın fəaliyyətini bəyəndiyi xəbər verilir.
Hesabata əsasən, 65 və daha yuxarı yaşlı respondentlərin 48 faizi Donald Trampın prezidentliyindən məmnun olduğunu bəyan edib, 18-29 yaşlıların 29 faizi, 30-44 yaşlıların 33 faizi, 45-64 yaşlıların 46 faizi eyni fikirdə olub.
Kişilərin 43, qadınların 37 faizinin dövlət başçısının işindən razı olduğu vurğulanır.
1946-cı il təvəllüdlü Donald Tramp Respublikaçılar Partiyasının üzvüdür. O, 2016-cı ilin prezident seçkisində Demokratlar Partiyasından Hillari Klintonu məğlub edib, 2017-ci il yanvarın 20-dən prezidentliyə başlayıb, 2020-ci ilin prezident seçkisində Demokratlar Partiyasının namizədi Cozef Baydenə uduzub, 2021-ci il yanvarın 20-də postunu tərk edib.
2024-cü ilin prezident seçkisində Demokratlar Partiyasının namizədi Kamala Harrisi udan Donald Tramp 2025-ci il yanvarın 20-dən yenidən dövlət başçısıdır.
Mənbə: Today.yougov.com
