Litva: hökuməti üç partiya qura bilər
Litvada yeni hökumət qurmağa mandat almış Sosial Demokrat Partiyası koalisiyaya Neman Şəfəqi Partiyası ilə Kəndlilər və Yaşıllar İttifaqını dəvət edib. Novator.az-ın məlumatına görə, Sosial Demokrat Partiyası sədri səlahiyyətlərinin icraçısı Mindauqas Sinkyaviçyus belə açıqlama verib.
Ölkədə hökumət 141 yerlik parlamentə seçkinin nəticələri əsasında formalaşır. 2024-cü ilin oktyabrında keçirilmiş parlament seçkisində qalib gələn Sosial Demokrat Partiyası Neman Şəfəqi Partiyası və Demokratların Litva Uğrunda İttifaqı ilə koalisiyaya girib, dekabrda Gintautas Palutskas baş nazir kürsüsünə oturub.
Adı korrupsiya qalmaqallarında hallandığına görə Gintautas Palutskas iyulun 31-də istefa verib, həmçinin Sosial Demokrat Partiyasının sədrliyindən gedib. Avqustun 14-də prezident Gitanas Nauseda baş nazir postuna Sosial Demokrat Partiyasının üzvü, əmək və sosial müdafiə nazirinin səlahiyyətlərini icra edən İnqa Rugineneni namizəd irəli sürüb. Namizədliyi parlament təsdiqləməlidir.
Parlamentdə Sosial Demokrat Partiyası 52, Vətən İttifaqı – Xristian Demokratlar Partiyası 28, Neman Şəfəqi Partiyası 19, Demokratların Litva Uğrunda İttifaqı 15, Liberallar Hərəkatı 12, Kəndlilər və Yaşıllar İttifaqı 8, Litva Polyakları və Xristian Ailələri İttifaqı 3, Azadlıq və Hüquq Partiyası 1, Milli Alyans Partiyası 1, partiyasız şəxslər 2 mandatla təmsil olunur.
Mənbə: Bns.lt
