Yerli seçkilərdə növbəti mərhələ
Gürcüstanda oktyabrın 4-nə təyin olunmuş yerli seçkilərin növbəti mərhələsi başlayıb: Mərkəzi Seçki Komissiyası partiyaların namizəd siyahılarını çözələyib qeydiyyat aparır.
17 partiyanın qatıldığı marafonda 64 şəhər/rayonda mer və məclis seçiləcək. Məclis seçkilərində qarışıq sistem (proporsional və majoritar sistemlər) tətbiq olunur. Mer seçilmək üçün etibarlı səslərin yarıdan çoxunu almaq, yerli məclislərə düşmək üçün partiyaların 4 faizlik baryeri keçməsi gərəkdir.
Novator.az bildirir ki, qanunun tələbinə görə, partiyaların yerli məclislərə namizəd siyahısında minimum 6, maksimum 45 nəfər olmalıdır (paytaxt Tbilisidə minimum 50, maksimum 100 nəfər). Majoritar sistemlə bölgədən asılı olaraq azı 5, uzağı 25 nəfər məclis üzvü seçilə bilər.
Gürcüstanda hökuməti 150 yerlik parlamentdə azı 76 mandatı olan partiya qurur. 2012, 2016, 2020 və 2024-cü illərin parlament seçkilərində Gürcü Arzusu – Demokratik Gürcüstan Partiyası qalib gəlib.
2021-ci ilin yerli seçkilərində Gürcü Arzusu 64 şəhərin 63-də mer postuna sahib çıxıb, məclislərdə də üstünlük əldə edib.
Gürcüstanda prezidenti parlamentin deputatlarından, muxtar qurumların ali təmsilçi orqanlarının və yerli özünüidarəetmə qurumlarının nümayəndələrindən ibarət Seçicilər Kollegiyası seçir. 2024-cü il dekabrın 29-dan prezident postunu Gürcü Arzusuna bağlı Mixail Kavelaşvili tutur.
