Litva: baş nazir kürsüsünə qadın gəlir
Litva prezidenti Gitanas Nauseda avqustun 14-də baş nazir postuna namizəd irəli sürüb: İnqa Ruginene. Novator.az bildirir ki, 1981-ci il təvəllüdlü İnqa Ruginene hakim Sosial Demokrat Partiyasının üzvüdür, hazırda əmək və sosial müdafiə nazirinin səlahiyyətlərini icra edir.
Baş nazirin namizədliyini parlament – Seym təsdiqləməlidir.
2024-cü ilin dekabrından baş nazir olan Gintautas Palutskas adı korrupsiya qalmaqallarında hallandığına görə iyulun 31-də istefa verib, həmçinin hakim Sosial Demokrat Partiyasının sədrliyindən getdiyini açıqlayıb. Avqustun 4-də prezident istefanı qəbul edib, baş nazir səlahiyyətlərinin icrası maliyyə naziri Rimantas Şadcyusa həvalə olunub, bununla yeni hökumətin qurulmasının yolu açılıb.
Yarı prezident idarə üsullu ölkə olan Litvada hökumət 141 yerlik parlamentə seçkinin nəticələri əsasında formalaşır. 2024-cü ilin oktyabrında keçirilmiş seçkidən sonra Sosial Demokrat Partiyası Neman Şəfəqi Partiyası və Demokratların Litva Uğrunda İttifaqı ilə koalisiyaya girib.
Mənbə: Lrt.lt/en
