Makroiqtisadi hesabat
Dövlət Statistika Komitəsi makroiqtisadi hesabat yayıb. Rəsmi məlumata görə, 2025-ci ilin yanvar-iyul aylarında Azərbaycanın pərakəndə ticarət şəbəkəsində 19,3 milyard manatlıq ərzaq məhsulları, içkilər və tütün məmulatları, 15,8 milyard manatlıq qeyri-ərzaq malları satılıb, alınan mallara xərclənən vəsaitin 50,5 faizi ərzaq məhsullarının, 4,4 faizi içkilər və tütün məmulatlarının payına düşüb.
Qeyd olunur ki, yanvar-iyun aylarında Azərbaycanın hüquqi və fiziki şəxsləri 166 ölkədəki tərəfdaşları ilə ticarət əməliyyatları həyata keçirib, 104 ölkəyə ixrac, 160 ölkədən idxal rəsmiləşib, 2024-cü ilin ilk yarısı ilə müqayisədə idxal real ifadədə 4,4 faiz artıb, ixrac 9,3 faiz azalıb.
İyulun 1-nə muzdla çalışan işçilərin orta aylıq nominal əməkhaqqının ötən ilin eyni dövrünə nəzərən 9,4 faiz artaraq 1097,3 manata çatdığı bildirilir (Ölkədə pensiyalar hər il yanvarın 1-də orta aylıq maaşın illik artım tempinə uyğun indeksləşdirilir. Əmək pensiyasının minimum məbləği 320 manatdır).
Yanvar-iyul aylarında 2024-cü ilin eyni dövrü ilə müqayisədə 0,9 faiz çox ümumi daxili məhsul (ÜDM) istehsal olunduğu vurğulanır. Dövlət Statistika Komitəsi bildirir ki, neft-qaz sektorunda 3,3 faiz azalma, qeyri-neft/qaz sektorunda 3,1 faiz artım qeydə alınıb, adambaşına 7076,9 manat ÜDM düşüb.
1996-cı ildə Azərbaycanda ÜDM 1,3 faiz, 1997-ci ildə 5,8 faiz, 1998-ci ildə 10 faiz, 1999-cu ildə 7,4 faiz, 2000-ci ildə 11,1 faiz, 2001-ci ildə 9,9 faiz, 2002-ci ildə 10,6 faiz, 2003-cü ildə 11,2 faiz, 2004-cü ildə 10,2 faiz, 2005-ci ildə 26,4 faiz, 2006-cı ildə 34,5 faiz, 2007-ci ildə 25 faiz, 2008-ci ildə 10,8 faiz, 2009-cu ildə 9,3 faiz, 2010-cu ildə 5 faiz artıb.
2011-ci il 0,1 faiz, 2012-ci il 2,2 faiz, 2013-cü il 5,8 faiz, 2014-cü il 2,8 faiz, 2015-ci il 1,1 faiz, 2017-ci il 0,2 faiz, 2018-ci il 1,5 faiz, 2019-cu il 2,5 faiz, 2021-ci il 5,6 faiz, 2022-ci il 4,6 faiz, 2023-cü il 1,1 faiz, 2024-cü il 4,1 faiz yüksəlişlə bitib.
1995-ci ildə 11,8 faiz, 2016-cı ildə 3,1 faiz, 2020-ci ildə 4,2 faiz azalma rəsmiləşib.
