Netanyahunun sülh şərtləri
İsrailin baş naziri Benyamin Netanyahu Qəzza müharibəsinin bitməsi şərtlərini açıqlayıb. Avqustun 10-u Yerusəlimdə mətbuat konfransı keçirən hökumət başçısı deyib ki, ilk növbədə HƏMAS təşkilatının bütün hərbi imkanları məhv edilməlidir.
Novator.az-ın məlumatına görə, Benyamin Netanyahu qalan şərtləri belə sıralayıb: israilli girovların azadlığa buraxılması, ölənlərin meyitlərinin qaytarılması; Qəzzanın hərbi qüvvələrsiz zona olması; bölgədə təhlükəsizliyin İsrailin nəzarətində qalması; Qəzzanın idarəçiliyinin İsrailə və Fələstinə aidiyyəti olmayan mülki administrasiyaya təhvil verilməsi.
Baş nazir əlavə edib ki, hazırda Qəzza bölgəsinin 70-75 faizi İsrail qüvvələrinin əlindədir.
1987-ci ildə yaradılan HƏMAS (İslami Müqavimət Hərəkatı) Fələstinin hərbi-siyasi təşkilatıdır, 2006-cı ildən Qəzza bölgəsinə nəzarət edib. 2023-cü il oktyabrın 7-də HƏMAS Qəzza bölgəsindən İsrail ərazilərinə hərbi müdaxilə edib, bir çox şəxs öldürülüb və ya girov götürülüb, ardınca böyük savaş başlayıb, Qəzzanın böyük hissəsi tam dağıdılıb. Dünya ictimaiyyətinin bir hissəsi İsrailin cavab tədbirini çox amansız sayır, fələstinlilərin soyqırımına məruz qoyulduğunu iddia edir.
1947-ci ildə BMT Fələstin torpaqlarının bölünərək ərazidə İsrail və Fələstin dövlətlərinin qurulmasına qərar verib. 1948-ci ildə yaradılan İsrail 1949-cu ildə BMT-yə qəbul edilib. Fələstin 1988-ci ildə müstəqil dövlət elan olunub, 2012-ci ildə BMT-də müşahidəçi statusu alıb.
BMT-nin Fələstinə ayırdığı ərazilərin xeyli hissəsi, o cümlədən paytaxt kimi nəzərdə tutulmuş Şərqi Qüds (Yerusəlim) İsrailin işğalındadır.
Benyamin Netanyahu Fələstinə qarşı sərt münasibəti ilə ad çıxarıb. O, 1996-1999 və 2009-2021-ci illərdə hökumətə rəhbərlik edib, 2022-ci ildən yenə baş nazirdir.
Qəzza qırğını Fələstin Dövlətinin rəsmən tanınmaq məsələsini yenidən gündəmə gətirib. Bu il iyulun 24-də Fransa, iyulun 29-da Böyük Britaniya, iyulun 30-da Kanada, Portuqaliya, Lüksemburq, Andorra, San Marino, Malta, Finlandiya, Yeni Zelandiya və Avstraliya Fələstinin müstəqilliyini tanıyacaqlarını bəyan ediblər.
Hazırda 150-yə yaxın ölkə Fələstinin müstəqilliyini tanıyır. Bu addımı atmayan ölkələr arasında tanımaq anonsu vermiş ölkələrlə yanaşı ABŞ, Panama, Puerto Riko, Kamerun, Eritreya, Belçika, Niderland, Monako, Danimarka, Almaniya, İsveçrə, Avstriya, Lixtenşteyn, İtaliya, Xorvatiya, Kosovo, Şimali Makedoniya, Yunanıstan, Estoniya, Latviya, Litva, Moldova, Myanma, Cənubi Koreya, Yaponiya da var.
Mənbə: Jpost.com
