Yeni prezidentdən yeni konstitusiya vədi
Polşa prezidenti səlahiyyətlərinin icrasına başlayan Karol Navrotski konstitusiya islahatı anonsu verib. Novator.az-ın məlumatına görə, avqustun 6-da keçirilmiş andiçmə mərasimində çıxış edən Karol Navrotski dövlət quruluşu islahatlarına məsul şura yaratmaq niyyətində olduğunu deyib. O, şuranın işinə bütün siyasi qüvvələrin, mütəxəssislərin, “dövlətçiliyin taleyinə biganə olmayan hər kəsin” cəlb olunacağını vurğulayıb: “Konstitusiyanın qəbul olunduğu 1997-ci ildən ötən müddətdə ölkədə tam fərqli geosiyasi və sosial durum formalaşıb. Siyasi təbəqə yeni konstitusiya üzərində işə başlamalıdır, inanıram ki, bu çalışmaları 2030-cu ilədək tamamlamaq mümkündür”.
Baş nazir Donald Tusk Karol Navrotskinin çıxışını pisləyib, dövlət quruluşu islahatlarına çağırışı hökumətin səlahiyyətlərini əldə etməyə cəhd kimi qiymətləndirib.
Polşa yarı prezident idarə üsullu ölkədir. Hökumət parlament seçkisinin nəticələri əsasında qurulur. Parlamentin aşağı palatası – Seym 460, yuxarı palatası – Senat 100 yerlikdir. Donald Tuskun liderlik etdiyi Vətəndaş Platforması hər iki palatada üstün mövqedədir.
Müxalif Hüquq və Ədalət Partiyasının namizədi olan Karol Navrotski iyunun 1-də, ümumxalq səsverməsinin ikinci turunda prezident seçilib.
Prezidentin səlahiyyət müddəti 5 ildir.
Mənbə: Wiadomosci.onet
