Litva yeni hökumətə yol alır
Litvada hökumət yenilənir. Novator.az bildirir ki, baş nazir Gintautas Palutskas istefa bəyanatı verib. İstefanın avqustun 4-də rəsmiləşməsi gözlənir.
2024-cü ilin dekabrından baş nazir olan Gintautas Palutskasın adı may ayından bəri korrupsiya qalmaqallarında hallanır. İyulun 31-də onun həm baş nazirlikdən, həm də hakim Sosial Demokrat Partiyasının sədrliyindən getdiyi bəyan olunub.
Litvada hökumət 141 yerlik parlamentə seçkinin nəticələri əsasında formalaşır. 2024-cü ilin oktyabrında seçilmiş indiki parlamentdə Sosial Demokrat Partiyası 52, onun hökumət ortaqları – Neman Şəfəqi Partiyası 19, Demokratların Litva Uğrunda İttifaqı 15 mandatla təmsil olunur.
Qalan mandatları Vətən İttifaqı – Xristian Demokratlar Partiyası, Liberallar Hərəkatı, Kəndlilər və Yaşıllar İttifaqı, Litva Polyakları və Xristian Ailələri İttifaqı, Azadlıq və Hüquq Partiyası, Milli Alyans Partiyası və partiyasız şəxslər bölüşür.
Prezident postunu Gitanas Nauseda tutur. O, 2019 və 2024-cü illərdə dövlət başçısı seçilib.
