Qusmanın təltifləri
İyulun 24-də TASS-ın baş direktorunun birinci müavini postundan çıxarılan Mixail Qusman Azərbaycanın “Şöhrət”, “Dostluq” və “Şərəf” ordenləri laureatıdır.
Əsası 1904-cü ildə qoyulan TASS Rusiyanın mərkəzi dövlət informasiya agentliyi, dünyanın ən iri media qurumlarındandır. 1998-ci ildən TASS-da çalışan Mixail Qusman 1999-cu ildən baş direktorun birinci müavini idi.
Mixail Qusman 1950-ci il yanvarın 23-də Bakı şəhərində doğulub, Azərbaycan Pedaqoji Xarici Dillər İnstitutunu (Azərbaycan Dillər Universiteti) və Bakı Ali Partiya Məktəbini (Dövlət İdarəçilik Akademiyası) bitirib.
Azərbaycan Gənclər Təşkilatları Komitəsi sədrinin müavini, SSRİ Gənclər Təşkilatları Komitəsinin informasiya şöbəsinin müdiri, “İnfomol” informasiya əməkdaşlığı qurumunun direktoru, “ANKOM – TASS” beynəlxalq təhlil agentliyinin vitse-prezidenti olub.
Rusiyanın əməkdar mədəniyyət işçisi, əməkdar jurnalistidir, “Dostluq”, “Şərəf”, “Vətənə xidmət”, “Aleksandr Nevski” ordenləri ilə təltif olunub.
Mixail Qusman İtaliya, Moldova, Belarus, Qazaxıstanın da orden və medallarına layiq görülüb.
