İsraildə hökumət böhranı təhlükəsi
İsraildə hökumət böhranı təhlükəsi ciddiləşir. “The Times of İsrael” nəşrinin məlumatına görə, hakim koalisiyaya daxil olan ŞAS Partiyası nazir kürsülərindən imtina edib. Partiyanın təmsilçiləri daxili işlər, əmək, sosial təminat, səhiyyə və dini işlər naziri postlarını tuturlar.
ŞAS dini təhsil alan şəxslərin hərbi xidmətdən azad olmasını nəzərdə tutan qanunun qəbulunun ləngiməsindən narazıdır. Parlamentdə təmsil olunan iki partiya eyni motivlə hakim koalisiyanı tam tərk edib. Hələlik koalisiyada qalan ŞAS eyni addımı atsa, parlament çoxluğu itiriləcək.
Novator.az bildirir ki, İsraildə hökuməti ümumxalq səsverməsində proporsional üsulla (partiya siyahıları üzrə) seçilən 120 nəfərlik parlamentdə (Knesset) azı 61 mandatı olan siyasi qüvvə qurur.
Knesset dörd ildən bir seçilir. Son seçki 2022-ci il noyabrın 1-də keçirilib. Həmin seçkidə Benyamin Netanyahunun liderlik etdiyi Likud Partiyası qanunverici orqana 32 mandat əldə edib. Hökumət qurmaq üçün koalisiyaya gedilib, Benyamin Netanyahu baş nazir kürsüsünə oturub.
1949-cu il təvəllüdlü Benyamin Netanyahu 1996-1999 və 2009-2021-ci illərdə də hökumətə rəhbərlik edib.
Mənbə: Timesofisrael.com
