ABŞ: diplomatlara dilini dinc saxlamaq tapşırılıb
ABŞ-da xarici siyasətə məsul kabinet üzvü – dövlət katibi Marko Rubio diplomatlara xarici ölkələrdəki seçkilərin ədalətliliyi və dürüstlüyü ilə bağlı rəy bildirməməyi tapşırıb. “Reuters” agentliyinin məlumatına görə, Dövlət Departamentinin iyulun 17-də amerikalı diplomatlara göndərdiyi xidməti teleqramda qeyd olunur ki, rəsmi Vaşinqton yalnız “aydın və əsaslı” xarici siyasət marağı olduqda seçkilərlə bağlı açıqlama verəcək.
Novator.az bildirir ki, “həssas” qeydi ilə işarələnmiş, məxfi olmayan sənədə əsasən, ABŞ diplomatının xarici ölkədəki seçki üzrə açıqlaması qalib namizədi təbrik etməyə və zəruri hallarda ortaq xarici siyasət maraqlarını vurğulamağa yönəlməli, mesajlar seçki prosesinin ədalətliliyi, legitimliyi yönündə fikirlərdən uzaq olmalıdır.
Məktubda seçki mövzusunda açıqlamaları yalnız dövlət katibinin və ya Departamentin rəsmi sözçüsünün verməli olduğu, diplomatların yüksək rəhbərliyin icazəsi olmadan belə bəyanatlar yaymasının yasaqlandığı vurğulanır.
18-ci əsrin sonlarında yaranmış ABŞ-ın xarici siyasətinin əsas istiqamətlərindən biri dünyada insan haqları, demokratiya və mətbuat azadlığının təşviqi olub. Donald Tramp administrasiyası bu cür siyasətdən uzaq durmağa üstünlük verir.
2017-2021-ci illərdə prezident olmuş Donald Tramp 2025-ci il yanvarın 20-dən yenə dövlət başçısıdır.
Mənbə: Reuters.com
