Ukraynada yeni baş nazir
İyulun 17-də prezident Vladimir Zelenskinin təqdimatına baxan Ukrayna parlamenti (Ali Rada) Yuliya Sviridenkonu baş nazir təyin edib.
1985-ci il təvəllüdlü Yuliya Sviridenko bu təyinata qədər baş nazirin birinci müavini-iqtisadiyyat naziri idi.
Əvvəlki baş nazir Denis Şmıqal müdafiə naziri postuna keçirilir.
Ukrayna Konstitusiyasına əsasən, hökuməti parlament formalaşdırır.
Novator.az bildirir ki, hökumətdə bu postlar var: baş nazir, baş nazirin birinci müavini-rəqəmsal transformasiya naziri, baş nazirin müavini-infrastrukturun inkişafı və ərazilər naziri, baş nazirin Avropa və Avroatlantik inteqrasiya üzrə müavini, xarici işlər naziri, müdafiə naziri, ədliyyə naziri, daxili işlər naziri, maliyyə naziri, iqtisadiyyat, ekologiya və kənd təsərrüfatı naziri, energetika naziri, sosial siyasət, ailə və birlik naziri, veteranlar naziri, təhsil və elm naziri, səhiyyə naziri, mədəniyyət naziri, gənclər və idman naziri.
Baş nazirin, xarici işlər və müdafiə nazirlərinin namizədliyini prezident, qalan hökumət üzvlərinin namizədliyini baş nazir verir.
Vladimir Zelenski 2019-cu ildən prezident postunu tutur. Ali Radada Vladimir Zelenskiyə bağlı Xalq Xidmətçisi Partiyası və müttəfiqləri çoxluqdadır.
Mənbə: Kyivindependent.com
