Ermənistan hökumətində yenilik
İyulun 16-da Ermənistanın ətraf mühit naziri dəyişib: Akop Simidyanı Ambarsum Matevosyan əvəzləyib. Novator.az bildirir ki, Ambarsum Matevosyan 2023-cü ildən baş nazirin müşaviri idi. O, 2021-2022-ci illərdə baş nazirin müavini olub.
Ermənistanda hökumət üzvlərini baş nazirin təqdimatı ilə prezident təyin edir. Nikol Paşinyanın baş nazirlik etdiyi hökumətdə bu şəxslər yer alır: Mger Qriqoryan, Tiqran Xaçatryan – baş nazirin müavinləri, Ararat Mirzoyan – xarici işlər naziri, Suren Papikyan – müdafiə naziri, Srbui Qalyan – ədliyyə naziri, Arpine Sərkisyan – daxili işlər naziri, Gevork Papoyan – iqtisadiyyat naziri, Vaqe Ovannisyan – maliyyə naziri, Mxitar Ayrapetyan – yüksək texnologiyalar sənayesi naziri, David Xudatyan – ərazi idarəçiliyi və infrastruktur naziri, Narek Mkrtçyan – əmək və sosial məsələlər naziri, Janna Andreasyan – elm, təhsil, mədəniyyət və idman naziri, Anait Avanesyan – səhiyyə naziri.
1975-ci il təvəllüdlü Nikol Paşinyan 2018-ci il mayın 8-dən baş nazir postundadır.
Hökuməti parlamentdə çoxluq təşkil edən qüvvə qurur. Hazırda Nikol Paşinyanın Vətəndaş Sazişi Partiyasının 107 yerlik qanunverici orqanda 69, müxalif qüvvələrin – Ermənistan blokunun 28, “Qürurluyam” blokunun 6 mandatı var. 4 deputat partiyasızdır.
