Orta maaş nə qədər artıb?
Yanvar-iyun aylarında Azərbaycanda 62 milyard 78,2 milyon manatlıq, 2024-cü ilin ilk yarısı ilə müqayisədə 1,5 faiz çox ümumi daxili məhsul (ÜDM) istehsal olunub. Hesabatı yayan Dövlət Statistika Komitəsi bildirir ki, neft-qaz sektorunda 3,1 faiz azalma, qeyri-neft/qaz sektorunda 3,9 faiz artım qeydə alınıb, adambaşına 6066,1 manat ÜDM düşüb.
Artım kənd təsərrüfatı məhsulunda 1,4 faiz (heyvandarlıq məhsulları istehsalında 1 faiz, bitkiçilik məhsulları istehsalında 1,8 faiz), nəqliyyat sektorunda yük daşınması üzrə 2,8 faiz, sərnişin daşınması üzrə 5,3 faiz, informasiya və rabitə xidmətlərinin həcmində 8,4 faiz, əhalinin gəlirlərində nominal ifadədə 7,2 faiz, ictimai iaşə dövriyyəsində real ifadədə 14,3 faiz, ödənişli xidmətlərin dəyərində real ifadədə 9,5 faiz göstərilir.
Qeyd olunur ki, yanvar-iyun aylarında dövlət büdcəsinə 19 milyard 803,9 milyon manat gəlib, büdcədən 17 milyard 95,6 milyon manat xərclənib.
Başqa bir rəsmi açıqlamaya əsasən, iyunun 1-nə muzdlu işçilərin orta aylıq nominal əməkhaqqı bir il öncəyə nəzərən 9,1 faiz artaraq 1095 manata çatıb.
Azərbaycanda pensiyalar hər il yanvarın 1-də orta aylıq maaşın illik artım tempinə uyğun indeksləşdirilir.
Əmək pensiyasının minimum məbləği 320 manatdır.
Ölkədə kişilər 65, qadınlar 64 yaş yarımda pensiyaya çıxır. 2026-cı il iyulun 1-dən qadınların da pensiya yaşı 65-ə qalxacaq.
